Monumenti i pavarësisë NEWBORN, i vendosur në qendër të kryeqytetit dhe simboli më i njohur i shtetësisë së Kosovës, ka marrë edhe këtë vit një pamje të re dhe një mesazh të përditësuar me rastin e 18-vjetorit të shpalljes së pavarësisë.
Krijuesi i monumentit, Fisnik Ismaili, ka prezantuar konceptin artistik për vitin 2026, bazuar në artin tradicional japonez “Kintsugi”, teknikë kjo që simbolizon shërimin, forcimin dhe rritjen e vlerës pas sfidave dhe vështirësive.
“Ky vit reflekton rrugëtimin e Kosovës gjatë viteve, duke përballuar sfida me qëndrueshmëri dhe duke u forcuar në procesin e zhvillimit të saj,” tha Ismaili.
NEWBORN, i vendosur përballë Pallatit të Rinisë dhe Sporteve në Prishtinë, është një skulpturë tipografike dhe një pikë referimi simbolike që përkujton Deklaratën e Pavarësisë më 17 shkurt 2008. Për pesë vite qëndroi me pamjen origjinale dhe më pas është ndryshuar çdo vit për t’iu përshtatur temave që nxjerrin në pah situata dhe aspirata të shoqërisë.
Megjithatë, këtë vit monumentit iu bë dhe një “burgosje” simbolike me hekura dhe mbishkrimin “Kosova e burgosur!”, nga aktivistët e platformës "Liria ka emër". Këtë mëngjes, ata e mbushën monumentin me 5000 emblema magnetike të Ushtrisë Çlirimtare të Kosovës (UÇK), duke thënë se ky veprim synon të pasqyrojë ndjenjën e padrejtësisë ndaj proceseve gjyqësore që po zhvillohen në Dhomat e Specializuara në Hagë.
Sot që Kosova feston 18 vjetorin e pavarësisë, në Hagë ndodhen të paraburgosur ish-udhëheqës të UÇK-së dhe institucioneve të para të Kosovës pas shpalljes së pavarësisë: Hashim Thaçi (ish-president dhe kryeministër që lexoi Deklaratën e Pavarësisë), Jakup Krasniqi dhe Kadri Veseli (ish-kryeparlamentarë) dhe Rexhep Selimi (ish-deputet).
Qytetarët marshuan nëpër rrugët e Prishtinës, duke u mbledhur në shesh dhe zona qendrore të kryeqytetit, në protestë kundër proceseve të gjykimit të tyre në Gjykatën Speciale në Hagë, të cilët po përballen me akuza për krime lufte dhe krime kundër njerëzimit. Marshimi u bë në mbrojtje të ish-udhëheqësve, të cilët qytetarët e Kosovës i shohin si figura kyçe të procesit të ndërtimit të shtetit.
