Ish-kuzhinieri i pallatit mbretëror britanik, Darren McGrady, i cili ka punuar për Princeshën Diana nga viti 1993 deri në vdekjen e saj në vitin 1997, shpesh ndan momente nga jeta në kuzhinën e familjes mbretërore. Në një video në kanalin e tij në YouTube, ai ka zbuluar se si përgatitej mëngjesi i saj i preferuar.
Overnight oats (drithëra/tërshërë e përgatitur që në mbrëmje) janë bërë trend rreth një dekadë më parë dhe sot mund të gjenden të gatshme edhe në treg për ata që nuk kanë kohë t’i përgatisin vetë. Por, siç duket, Princesha Diana i shijonte ato shumë kohë përpara se të bëheshin të njohura në rrjetet sociale.
“Ajo kishte vizituar një klinikë shëndetësore në Zvicër dhe atje i provoi për herë të parë këto ‘overnight oats’,” rrëfen McGrady. “Në fakt, ato quheshin Bircher Muesli dhe ishin shpikur nga një dietolog zviceran.”
“E mori recetën me vete, u kthye dhe më tha: ‘Darren, këtë dua ta ha çdo mëngjes’,” shtoi ai.
McGrady, duke theksuar se tërshëra është “e pasur me fibra”, shpjegon se si përgatiste mëngjesin e saj të preferuar. Në vend që ta linin tërshërën të zbutet gjatë natës në qumësht apo pije bimore, siç është më e zakonshme sot, ai përdorte lëng portokalli.
Në mëngjes, i shtonte kos të trashë (kos grek), që është një burim i shkëlqyer proteine, pak mjaltë dhe lëng limoni. Edhe pse mund të shtoni çfarëdo fruti të preferuar, Diana preferonte ta përziente me mollë, arra dhe boronica.
McGrady pranoi se, kur përgatiste këtë mëngjes për Princeshën Diana, "e dyfishonte recetën" që të mund ta shijonte edhe vetë.
