SHBA-ja do të ofrojë shërbime pasaportash për qytetarët në vendbanimet e paligjshme në Bregun Perëndimor
SHBA-ja do të ofrojë për herë të parë shërbime konsullore dhe pajisje me pasaporta për shtetasit amerikanë në vendbanimin izraelit Efrat në Bregun Perëndimor të pushtuar, një veprim që u kritikua nga Autoriteti Palestinez dhe Hamasi si shkelje e së drejtës ndërkombëtare dhe si zvogëlim i mundësisë për një shtet të pavarur palestinez.
Ambasada amerikane në Jeruzalem tha se nisma lidhet me 250-vjetorin e pavarësisë së SHBA-së dhe se shërbime të ngjashme do të ofrohen edhe në vendbanime të tjera, ndërsa ministri i Jashtëm izraelit Gideon Saar e mirëpriti vendimin.
Vendbanimet izraelite në Bregun Perëndimor, ku jetojnë mbi 500 mijë kolonë mes rreth 3 milionë palestinezësh, konsiderohen të paligjshme sipas së drejtës ndërkombëtare dhe masa vjen në një kohë tensionesh dhe dhune të shtuar në zonë.
"Një forcë shkatërruese": si stuhitë e fundit të Mesdheut u shndërruan në tragjedi
Një seri stuhish të fuqishme ka goditur Mesdheun perëndimor javët e fundit, duke shkaktuar përmbytje shkatërruese dhe dhjetëra viktima në Spanjë, Portugali dhe Marok, ku reshjet rekord dhe erërat e forta rrëzuan shtëpi, përmbytën qytete dhe lanë mijëra njerëz pa energji.
Shkencëtarët po hetojnë rolin e ngrohjes globale, ndërsa analiza paraprake tregon se temperatura më e lartë e detit dhe ndryshimet klimatike kanë rritur intensitetin e reshjeve dhe e kanë bërë më të mundshme valën e stuhive.
Autoritetet në disa zona u vlerësuan për evakuime në kohë, por shumë banorë thanë se askush nuk ishte i përgatitur për një forcë kaq shkatërruese, që mund të kishte shkaktuar edhe më shumë viktima.
Korea e Veriut shmang marrëdhëniet me Jugun, ndërsa Kim Jong-un thotë se mund të "mirëkuptohet" me SHBA-në
Korea e Veriut deklaroi se përjashton çdo afrim me Korenë e Jugut, duke e quajtur atë entitet armiqësor.
Udhëheqësi Kim Jong-un paralajmëroi se ata mund ta “shkatërrojnë plotësisht” Jugun nëse kërcënohet siguria e tyre dhe bëri thirrje për zhvillimin e sistemeve të reja raketore, përfshirë raketa ndërkontinentale dhe armë taktike bërthamore.
Ndërkohë, ai la të hapur mundësinë e dialogut me Uashingtonin, duke theksuar se e ardhmja e marrëdhënieve varet nga qëndrimi amerikan.
Fotoja e re e Rrugës së Qumështit, "dritare për të kuptuar se si formohen yjet"
Observatori Europian Jugor publikoi një fotografi spektakolare të zonës qendrore molekulare të Rrugës së Qumështit, duke zbuluar me detaje të papara më parë gazrat e ftohtë kozmikë ku formohen yjet.
Imazhi, që mbulon një rajon mbi 650 vite-dritë të gjerë, u realizua nga rrjeti me 66 antena ALMA në shkretëtirën Atakama në Kili dhe paraqet kushtet ekstreme pranë qendrës së galaktikës sonë.
Sipas studiuesve, kjo pamje ofron një “dritare” të rrallë për të kuptuar se si formohen yjet dhe planetët kur janë shumë pranë njëri-tjetrit, siç mendohet të ketë ndodhur në pjesën më të madhe të universit.
