Departamenti i Shtetit i SHBA-së ka njoftuar se do të pezullojë përkohësisht lëshimin e vizave emigruese për shtetasit e një liste të gjerë vendesh, përfshirë edhe Shqipërinë.
Vendimi lidhet me një rishikim të politikave që kanë të bëjnë me përdorimin e përfitimeve publike nga emigrantët në Shtetet e Bashkuara. Sipas njoftimit zyrtar, masa bazohet në qëndrimin e administratës së presidentit Donald Trump, sipas të cilit emigrantët duhet të mos përbëjnë barrë për sistemin publik amerikan.
Autoritetet amerikane po kryejnë një rishikim të plotë të politikave, rregulloreve dhe udhëzimeve ekzistuese, me qëllim që emigrantët nga vendet e konsideruara me rrezik të lartë të përdorimit të ndihmave sociale të mos përfitojnë nga skemat publike dhe të mos konsiderohen barrë publike.
Pezullimi pritet të hyjë në fuqi më 21 janar 2026. Ambasada e SHBA-së në Shqipëri sqaron se gjatë kësaj periudhe aplikantët mund të vazhdojnë të dorëzojnë dokumentacionin dhe të paraqiten në intervista të planifikuara, por asnjë vizë emigruese nuk do të lëshohet deri në përfundimin e pezullimit.
Sipas udhëzimit, ka disa përjashtime nga kjo masë. Shtetasit me dyshtetësi, të cilët aplikojnë me pasaportë të një vendi që nuk përfshihet në listën e prekur, nuk do t’i nënshtrohen pezullimit. Po ashtu, masa nuk prek vizat turistike apo lloje të tjera vizash jo-emigruese.
