Foto: Benny Blanco, Selena Gomez/ "Friends Keep Secrets"

Selena Gomez dhe bashkëshorti i saj, Benny Blanco, folën hapur për mënyrën si e menaxhojnë së bashku çrregullimin bipolar të saj.

Gomez ishte e ftuar në episodin e së martës të podkastit të Blanco-s, “Friends Keep Secrets”, ku në një bisedë me mikun e tij të ngushtë Lil Dicky dhe bashkëshorten e tij, Kristin Batalucco, ish-ylli i Disney Channel foli për sfidat e shëndetit të saj mendor.

Ajo e përshkroi momentin kur mori diagnozën për çrregullim bipolar si “jashtëzakonisht të ndërlikuar”, duke shpjeguar se rrugëtimi i saj përfshiu disa terapistë dhe katër qendra rehabilitimi të ndryshme.

Blanco, 37 vjeç, ndërhyri duke thënë se bashkëshortja e tij ndonjëherë përjeton episode manie dhe se në fillim nuk e kuptonin çfarë po ndodhte.

“Ajo e kupton pasi ka kaluar episodi dhe ndonjëherë as nuk është e ndërgjegjshme kur po ndodh,” tha ai.

“Është një çështje shumë delikate, sepse teknikisht nuk duhet të përballesh drejtpërdrejt me personin kur është në kulmin e episodit. Edhe kur ishim në lidhje, ajo ishte shumë e vetëdijshme.”

Gomez, 33 vjeç, tha se nuk ndjen turp për episodet e saj të manisë dhe se fakti që i njeh ato e ndihmon t’i dallojë më shpejt.

“Është e dobishme të kesh një partner që e kupton situatën, të pranon, e pastaj gradualisht përballet me çfarë po ndodh,” tha ajo për Blanco-n.

Ajo shtoi se marrja e diagnozës e ndihmoi të jetonte “lirshëm” dhe ta kuptonte më mirë reagimin e saj ndaj situatave të ndryshme.

“Veproja nga frika, veproja nga dashuria, nga pasioni, gjithçka ishte e paqëndrueshme,” kujtoi ajo. “Ishte çmenduri.”

Këngëtarja e bëri publik çrregullimin bipolar në vitin 2020, pas një krize publike që përjetoi në vitin 2018.

Në tetor 2024, ajo tha se në ditët e vështira për shëndetin mendor zgjedh të rrethohet vetëm me një ose dy persona të besuar.

“Ndonjëherë izolimi kur nuk ndihem mirë mund të jetë i frikshëm. Më vijnë shumë mendime,” tha ajo në një intervistë në rrjetet sociale me influencuesin Rami Bader. “Por nëse jam pranë njerëzve që më bëjnë të ndihem mirë dhe më japin hapësirë të them gjithçka, kjo më ndihmon gjithmonë.”

Në një intervistë për Vanity Fair në shtator 2024, ajo tregoi se tani po merr mjekimin e duhur dhe se përdor edhe ndryshimin e temperaturës, si uji i ftohtë apo ngrohëset, si një mënyrë ndihmëse gjatë përkeqësimeve fizike dhe mendore.

Sipas nevojës, këngëtarja tha se temperaturat e ndryshme i duken qetësuese në momente të ndryshme.