Foto: Tom Holland, Zendaya/ Ricky Vigil M / Justin E Palmer/GC Images

Zendaya dhe Tom Holland janë martuar, sipas stilistit të Zendaya-s, Law Roach, i cili bëri deklaratën gjatë Actor Awards 2026, të dielën më 1 mars. Gjatë bisedës me Access Hollywood në tapetin e kuq, Roach tha: “Dasma tashmë ka ndodhur,” duke tallur gazetarët me fjalët: “E humbët.” Kur u pyet nëse ishte e vërtetë, ai qeshi dhe konfirmoi: “Është shumë e vërtetë!”

Çifti u fejuan gjatë pushimeve në fund të vitit 2024. Spekulimet për fejesën e tyre nisën gjatë Golden Globe Awards 2025 më 5 janar, kur Zendaya u pa duke mbajtur një unazë diamanti në gishtin e majtë. TMZ e konfirmoi lajmin të nesërmen, duke cituar burime të afërta me çiftin. Një burim i brendshëm i tha PEOPLE se Tom Holland kishte dashur të propozonte prej kohësh dhe gjithmonë e kishte ditur se Zendaya ishte “e duhura”.

Në shtator 2025, Tom Holland konfirmoi fejesën gjatë një paneli, duke korrigjuar një gazetar që e quajati Zendaya-n “të dashurën e tij” duke thënë me humor: “E fejuara.” Çifti, i njohur për privatësinë e tyre, fillimisht nxiti thashetheme për lidhjen në vitin 2016 gjatë xhirimeve të “Spider-Man: Homecoming”, por të dy e mohuan romancën në atë kohë.

Në korrik 2017, një burim i tha PEOPLE se ata kishin filluar të dilnin gjatë xhirimeve të filmit.

“Kanë qenë shumë të kujdesshëm për ta mbajtur lidhjen private dhe larg syrit të publikut, por kanë shkuar në pushime së bashku dhe përpiqen të kalojnë sa më shumë kohë të mundshme bashkë,” tha burimi.

Një burim tjetër shtoi se të dy janë ambiciozë, e sfidojnë njëri-tjetrin, dhe kanë një sens humori të ngjashëm, duke e bërë shpesh njëri-tjetrin për të qeshur.

Romanca e tyre u konfirmua zyrtarisht në vitin 2021 kur ata u panë duke u puthur në makinë. Në nëntor të atij viti, Holland foli për sfidat e balancimit të famës me privatësinë e marrëdhënies gjatë një interviste me GQ, duke thënë se momentet që mendon se janë private tani ndahen me botën. Zendaya shprehu ndjenja të ngjashme, duke thënë se dashuria është diçka e shenjtë dhe e veçantë, që duhet të përjetohet dhe të ruhet mes dy personave që e duan njëri-tjetrin.

Më vonë, Zendaya ka folur për të pranuar faktin që marrëdhënia e saj me Tom Holland gjithmonë do të ketë një element publik, duke shtuar se nuk do të lejojë që kjo t’i ndalojë të jetojë jetën e saj apo të shijojë lidhjen plotësisht. Ajo tha në një intervistë për Elle më 23 gusht 2023:

“Nuk mund të mos jem person dhe të jetoj jetën time ndërkohë që dua personin që dua. Nuk mund të fshihesh. Nuk është kënaqësi as kjo. Po e kuptoj më shumë se kurrë tani.”