Benita Zena dhe Olsa Muhameti duket se kanë lënë pas përplasjet dhe kanë bërë paqe.
Dyshja janë shfaqur së bashku në një foto të publikuar nga producentja e “Big Brother VIP Kosova” në rrjetet sociale, e shoqëruar me mbishkrimin:
“Përgatitjet e finales vazhdojnë. Me shpejtësinë e Bugatti-t të sezonit”.
Pas eliminimit, Benita reagoi në profilin e saj duke akuzuar indirekt produksionin për manipulim të votave të publikut, me qëllim dërgimin e Hygerta Sakos në finalen e madhe.
“Faleminderit @bigbrothervipkosova që i mbajtët premtimet, ne kemi votat dhe faktet! Pa dyshim, kjo është çmenduri!”, shkroi ajo.
Në disa postime të tjera, që më vonë u fshinë, Benita përsëriti pretendimet për manipulim dhe la të kuptohej se fituesi i këtij edicioni ishte i paracaktuar nga produksioni.
Nga ana tjetër, Olsa Muhameti nuk iu përgjigj drejtpërdrejt akuzave, por reagoi në mënyrë të tërthortë duke ripostuar një story të Dolce-s, një tjetër ish-banore e eliminuar në gjysmëfinale. Në mesazhin e saj, Dolce falenderonte produksionin dhe Olsën “për përvojën unike që do ta mbajë gjithmonë me krenari”, si edhe publikun për mbështetjen.
Në ripostim, Olsa shkroi:
“Dolce, faleminderit për vlerësimin. I bekuar qoftë ai që e ka këtë vlerë.”
Megjithatë, pas “thumbave” në distancë, duket se dyshja kanë gjetur gjuhën e përbashkët.
