Catherine, princesha e Uellsit theu protokollin mbretëror duke përshëndetur një grup të rinjsh. Pasi ajo dhe princi William mbërritën në Uells të enjten, princesha e Uellsit takoi një grup fëmijësh me përqafime.
Ajo ndaloi në Oriel Davies Gallery, një galeri arti, ku foli me disa fëmijë që kishin pritur jashtë në shi për ta takuar. Middleton përqafoi disa prej tyre, përfshirë një vajzë të vogël që u kap pas palltos së saj.
Kështu, princesha Kate sfidoi një rregull të pashkruar që prej dekadash ka synuar të ruajë distancën formale midis familjes mbretërore dhe publikut. Tradicionalisht, anëtarët e familjes mbretërore shmangin kontaktin fizik spontan, përveç rasteve kur përshëndetja nis prej tyre dhe zakonisht kufizohet në shtrëngim duarsh. Kjo distancë është konsideruar pjesë e ruajtjes së dinjitetit institucional dhe neutralitetit publik të monarkisë.
Megjithatë, gjatë viteve të fundit, qasja ka evoluar. Brezi më i ri i familjes mbretërore ka treguar më shumë afërsi emocionale me qytetarët, sidomos me fëmijët. Përqafimi i një vajze të vogël që u kap pas palltos së saj nuk ishte thjesht një gjest spontan, por një sinjal i një monarkie më njerëzore, më të prekshme dhe më pak ceremoniale.
Në këtë aspekt, Kate i ngjan dukshëm princeshë Diana-s. Diana ishte e njohur për thyerjen e barrierave fizike dhe emocionale: ajo përqafonte fëmijë, prekte të sëmurë me SIDA në një kohë kur ekzistonte frikë dhe paragjykim dhe përshëndeste turmat me një ngrohtësi të pazakontë për standardet mbretërore të asaj kohe. Ashtu si Diana, edhe Kate Middleton duket se e kupton fuqinë simbolike të kontaktit njerëzor, një përqafim mund të komunikojë më shumë se një përkulje formale apo një buzëqeshje e rezervuar.
Për më tepër, krahasimi nuk qëndron vetëm te gjesti fizik, por edhe te mënyra se si ajo ndërton imazhin publik: kombinimi i elegancës klasike me një qasje të butë dhe të afrueshme.
Gjatë vizitës në Uells, Middleton veshi sërish një pallto ngjyrë bordo me dy radhë kopsash nga Alexander McQueen, të cilën e ka veshur më parë në vitin 2024 kur ajo dhe princi William pritën Emirin e Katarit në Buckingham Palace.
Veshja e saj njëngjyrëshe përfshinte gjithashtu një bluzë me fjongo në jakë dhe një fund me pala nga Co. Ajo e kompletoi paraqitjen me çizme lëkure në të njëjtën ngjyrë dhe vendosi në jakën e palltos një karficë në formë narcisi për nder të Ditës së Shën Davidit, që festohet çdo vit më 1 mars. Lulja e verdhë simbolizon shenjtin mbrojtës të Uellsit.
Në fundjavë, princesha e Uellsit bëri një ndryshim të dukshëm në flokët e saj ngjyrë gështenjë, duke u paraqitur me kaçurrela në ceremoninë e BAFTA Awards 2026. Duke ecur në tapetin e kuq me një tjetër veshje të ripërdorur, këtë herë një fustan ngjyrë vjollcë të zbehtë nga Gucci, të cilin e ka veshur për herë të parë në vitin 2019, ajo zëvendësoi ondet e saj të buta me kaçurrela që të kujtonin stilin e viteve 1980.
