Po ndodh diçka shumë interesante në “Big Brother VIP Kosova”: publiku shqiptar (ai publiku me histori të gjatë homofobie, paragjykime dhe etiketime që janë trashëguar brez pas brezi) po bën diçka krejt të papritur. Po “i lidh” dy burra.
E kemi fjalën për Londrimin dhe Klodin. Dy konkurrentë, dy personazhe të fortë, plot energji, karizëm dhe humor, të cilëve ndjekësit po u montojnë video romantike me zemra, fishekzjarre, lëvizje të ngadalta. Pak a shumë si videot që postonin për çdo histori të mundshme dashurie në reality show.
Gjëja më interesante? Askush nuk po debaton “janë apo s’janë homoseksualë”. Askush nuk po përqendrohet te orientimet, etiketimet apo preferencat e tyre. Thjesht njerëzve po u pëlqejnë bashkë.
Raporti i tyre e ka kaluar atë fazën klasike të dy burrave që kanë një shoqëri të këndshme bashkë, si për shembull Ilir Shaqiri dhe Sabiani. Publiku po sheh dy djem që kanë kimi, energji të mirë, humor dhe komunikojnë këndshëm me njëri-tjetrin. Dhe njerëzit po thonë: “Ooo, sa bukur do ishin bashkë.”
Disa komente: "Shpresoj të lidhen bashkë", "Do ishte bukur të lidheshin", "Jam investuar te raporti i tyre", "Sa shumë dua të jenë bashkë", "Po ndodh një fenomen kulturor", "Njerëzit duan që këta të dy të lidhen; zemra ime po shërohet" etj.
Një sqarim i rëndësishëm: As Londrimi, as Klodi nuk kanë deklaruar ndonjë pëlqim apo interes romantik. Asnjë prej të dyve nuk ka dhënë deklarata për orientimin seksual. Pra, gjithçka që po ndodh është produkt i fantazisë kolektive të popullit. Në vend të dramës, për herë të parë kemi një love story që ekziston vetëm në imagjinatën e publikut.
Kemi progres: njerëzit po krijojnë një histori romantike mes dy burrave, pa u shqetësuar hiç nga fakti që janë dy burra. Sepse kur dy njerëz janë tërheqës, të çlirët dhe mirë me veten e tyre, publiku s’ka nevojë për etiketime.
