Foto: Pinterest

Nëse ju ka pëlqyer stili i Colleen Hoover, por doni një roman që i largohet dramave romantike të autores, për të hyrë në një territor më intim dhe më të heshtur, ju sugjerojmë librin “Pa Meritin”, sjellë në shqip nga Botimet Living. Një libër mbi familjen, shëndetin mendor dhe ndjenjën e të qenit i padukshëm brenda mureve të shtëpisë sate.

Merit Vosi mbledh trofe që nuk i ka fituar dhe sekrete që familja e saj e detyron t’i ruajë. Ndërsa vërtitet në dyqanin e antikave të qytetit për trofeun e radhës, takon Seganin. Mënyra e tij e të menduarit dhe idealizmi i palëkundur, e çarmatosin dhe ndezin tek ajo një jetë të re... derisa zbulon se ai është i lidhur. Paskëtaj, Meriti tërhiqet më thellë në vetvete, duke e vëzhguar familjen e vet nga jashtë, kur mëson një sekret që asnjë trofe në botë nuk mund ta shlyejë.

E lodhur nga gënjeshtrat, përpara se t'i lërë ato pas përgjithmonë, ajo vendos që të shkatërrojë iluzionin e familjes së lumtur, ku nuk ka qenë kurrë pjesë. Kur plani i saj dështon, Meriti detyrohet të përballet me pasojat tronditëse të së vërtetës dhe të humbjes së djalit të vetëm që do.

Kjo nuk është një histori dashurie në kuptimin klasik, por historia e një vajzë që jeton në një familje ku askush nuk flet për gjërat që kanë rëndësi. Në vend të komunikimit, ata mbledhin sekrete; në vend të afrimitetit, krijojnë distancë.

Një shtëpi plot njerëz, ku askush nuk dëgjon

Meriti është një protagoniste që nuk kërkon doemos shpëtim, por vetëm sa të kuptohet. Ajo ndien se ekzistenca e saj nuk ka peshë, se është gjithmonë në hijen e motrës, e prindërve, e rregullave të pashkruara të një familjeje, që funksionon me themel heshtjen.

Në këtë roman, Hoover trajton tema si:

- depresioni dhe izolimi emocional
- rivaliteti mes motrave
- ndjenja e fajit dhe e pavlefshmërisë
- nevoja për të thënë të vërtetën, edhe kur ajo shkatërron ekuilibrin familjar

Stili i rrëfimit në vetën e parë e bën përvojën e leximit shumë intime. Mendimet e protagonistes janë të sinqerta, ironike dhe shpesh të dhimbshme, duke krijuar një lidhje të menjëhershme me lexuesin.

Lista e të vërtetave: çasti i çlirimit

Pika më e fortë e romanit është momenti kur Meriti vendos të shkruajë gjithçka që ka mbajtur brenda. Lista e saj e të vërtetave është një akt rebelimi, por edhe një thirrje për t’u dëgjuar. Këtu romani shndërrohet në një lloj reflektimi për:

- rëndësinë e komunikimit në familje
- mënyrën se si neglizhohet shëndeti mendor 
- faktin se dashuria nuk mjafton, nëse nuk shprehet

Jo çdo gabim meriton të shpaguhet. Ndonjëherë, duhet vetëm që të falet.

Colleen Hoover përtej romancës

Ndryshe nga fenomeni “Mbaron me ne”, ky libër është më i ndjeshëm dhe më realist. Hoover sikur i lë pas dramat e forta, për të treguar një histori më të zakonshme, por emocionalisht shumë të ngarkuar. 

Titujt e tjerë bestseller të Colleen Hoover-it të sjellë në shqip nga Botimet Living janë: “Mbaron me ne”, “Fillon me ne”, “Gjithçka perfekte tek ti”, “Dashuri e shëmtuar”, “9 nëntori”, “Kockat e zemrës”, “Kujtimet e tij”, “Veriti”, “Pengu im”, “Lajla”, “Kurrën e kurrës” dhe “Shumë vonë”.

Librat e saj kanë pushtuar listat më prestigjioze si New York Times Best Seller, duke krijuar një komunitet të tërë lexuesish, që ndjekin me përkushtim çdo libër të ri. Fenomeni “CoHo”, siç e quajnë fansat, nuk është vetëm letrar, por edhe emocional. Librat e saj lexohen shpejt, por të mbeten gjatë në kujtesë. Dhe ndoshta është kjo arsyeja pse Colleen Hoover është sot një nga zërat më të dashur dhe më të fuqishëm në letërsinë bashkëkohore.