Thashethemet për një romancë të re në botën e showbiz-it dhe sportit kanë “marrë dhenë” gjatë fundjavës, pasi blogeri francez i modës Aqababe pretendoi se kishte parë së bashku futbollistin e famshëm Kylian Mbappé dhe aktoren spanjolle Esther Expósito në një nga baret më të njohura të Parisit.

Sipas tij, superylli i Real Madrid dhe aktorja, e cila u bë e famshme në mbarë botën falë serialit të Netflix-it Elite, u panë në shoqërinë e njëri-tjetrit duke kaluar një mbrëmje mjaft diskrete në kryeqytetin francez. Që nga ai moment, rrjetet sociale janë vënë në lëvizje, me fansat që përpiqen të zbulojnë çdo detaj të mundshëm për marrëdhënien e tyre.

Dyshimet u shtuan edhe më shumë kur përdoruesit e internetit vunë re se Mbappé dhe Expósito e ndjekin njëri-tjetrin në Instagram dhe kanë bërë like në disa postime. Kjo mjaftoi që shumëkush të spekulonte se mes tyre mund të ketë diçka më shumë sesa thjesht miqësi. Megjithatë, përpjekjet e disa fansave dhe paparacëve për t’i gjetur së bashku në Paris nuk dhanë rezultat.

Fati, megjithatë, ishte në anën e paparacëve në Spanjë. Revista e njohur HOLA! magazine publikoi disa foto ekskluzive ku dyshohet se Mbappé dhe Expósito shihen duke zbritur nga një avion privat në aeroportin e Madridit, pas një udhëtimi që dyshohet se e kanë bërë së bashku drejt kryeqytetit spanjoll.

Kylian Mbappé konsiderohet një nga futbollistët më të talentuar të brezit të tij dhe një nga figurat më të mëdha të futbollit botëror. Pas viteve të suksesshme te Paris Saint-Germain, ai u transferua te Real Madrid, ku vazhdon të jetë në qendër të vëmendjes së mediave sportive.

Nga ana tjetër, Esther Expósito është një nga aktoret më të njohura spanjolle të gjeneratës së re. Roli i saj si Carla në serialin Elite e shndërroi në një fenomen global dhe i siguroi miliona ndjekës në rrjetet sociale, duke e bërë gjithashtu një nga figurat më të kërkuara në eventet e modës dhe në industrinë e argëtimit.