Që prej sezonit të kaluar, rripat janë rikthyer fuqishëm në gardërobat tona, duke dëshmuar se nuk janë më thjesht një aksesor praktik, por një element i guximshëm që transformon çdo veshje. Pas disa vitesh në hije, stilistët i kanë sjellë sërish në qendër të vëmendjes, duke u dhënë rol protagonist në kombinimet e sezonit të ri.
Në pasarela, u prezantuan versione për çdo stil dhe preferencë. Te Brandon Maxwell pamë rripa të mëdhenj në formë korseje që theksonin belin mbi pulovra, duke krijuar një siluetë të strukturuar dhe femërore. Ndërsa te Boss dominuan rripat e hollë dhe elegantë, të vendosur më poshtë se zakonisht për një efekt modern dhe minimalist.
Te Versace, tokëzat katrore dhe të theksuara i dhanë një frymë bashkëkohore pantallonave kapri, ndërsa te Chloé rripat prej lëkure modeluan xhaketat oversize.
Sekreti i këtij sezoni? Eksperimentimi.
Një rrip mbi një xhaketë klasike mund ta bëjë menjëherë më femërore dhe më interesante, ndërsa një model bohem është zgjedhja perfekte për veshjet e përditshme.
Mesazhi është i qartë: këtë vit, rripat nuk janë aksesorë, por kryefjalë, që të ftojnë të mendosh jashtë kornizave.
