Pushimet luksoze të Kylie Jenner nëpër Europë morën një kthesë të papritur dhe dramatike. Gjithçka filloi me një pjatë makarona në një fshat piktoresk grek. Ylli i “reality TV”, 27 vjeç, darkoi në restorantin familjar Tassia, në Fiscardo të Kefalonisë, gjatë pushimeve.
Restoranti, i drejtuar nga Polychronis Dendrinos dhe Tassia Dendrinou, e mirëpriti Kylie-n me shumë entuziazëm, duke ndarë një foto me të në Instagram dhe duke e cilësuar si një nder të veçantë:
“Ishte një kënaqësi e vërtetë të prisnim një të ftuar kaq të jashtëzakonshme. Një sipërmarrëse ikonike dhe përcaktuese e trendeve globale, ajo përjetoi mikpritjen dhe kuzhinën tonë greke.”
Në foto, Kylie shfaqet me një fustan të bardhë me pala, duke buzëqeshur krah pronarëve të restorantit. Por postimi nuk u prit mirë nga të gjithë ndjekësit: seksioni i komenteve u mbush me reagime të shumta, ku disa e akuzonin restorantin për trajtim të privilegjuar ndaj VIP-ave.
“Tani e di ku mos të shkoj,” shkruan dikush.
Një tjetër komenton: “Po klientët e zakonshëm, a i trajtoni kështu?”
Një komentues tjetër shton me ironi: “Nder? Qesharake… sikur të ishte ndonjë figurë e rëndësishme për njerëzimin.”
Madje pati edhe thirrje për bojkot ndaj restorantit. Por krahas kritikave, shumë të tjerë dolën në mbrojtje të lokalit familjar:
“Njerëzit që mërziten për këtë postim, thjesht kanë nevojë të dalin nga shtëpia,” shkroi dikush.
“Nëse Kylie Jenner do të promovonte biznesin tim, edhe unë do e ndaja me botën!”
Dikush shtoi edhe një vëzhgim interesant:
“Komentuesit negativë pa kuptuar po e fusin postimin në algoritëm, që do të thotë më shumë shikime dhe ndoshta më shumë klientë për restorantin.”
Falë postimit me Kylie-n, llogaria e restorantit në Instagram, e cila kishte rreth 3,800 ndjekës, fitoi 23,000 pëlqime dhe qindra komente brenda pak kohësh.
Restoranti Tassia është i njohur për mikpritjen ndaj personazheve të famshëm dhe nuk e ka fshehur kurrë këtë. Në të kaluarën kanë darkuar yje si Demi Moore, Magic Johnson, Samuel L. Jackson, Flo Rida, Rick Stein, madje edhe djali i mbretëreshës Camilla, Tom Parker Bowles.
Megjithatë, asnjë nga postimet për të ftuarit e mëparshëm nuk shkaktoi kaq shumë reagime sa ai për Kylie Jenner.
