Dy të tretat e të rriturve zgjedhin të mbajnë miqësi me ish-partnerët e tyre, sipas një ankete të realizuar në vitin 2023. Në pamje të parë, kjo duket krejt normale, sidomos kur një marrëdhënie ka pasur dashuri të sinqertë dhe shumë gjëra të përbashkëta.
Por tabloja ndërlikohet nga një tjetër fakt: më shumë se gjysma e atyre që thonë se janë “thjesht miq” vazhdojnë të kenë marrëdhënie intime me ish-in. Dhe këtu lind pyetja: sa miq janë në të vërtetë?
Specialistja e certifikuar e marrëdhënieve, Anja Vojta, shprehet se ka dëgjuar shumë justifikime nga njerëz që zgjedhin të mbeten miq me ish-partnerët. Sipas saj, një miqësi me një dashuri të vjetër është e vështirë të funksionojë, veçanërisht nëse marrëdhënia ka qenë toksike.
“Ju hyni në të njëjtën dinamikë me të njëjtat plagë dhe të njëjtët shkaktarë emocionalë. Fakti që keni qenë çift e bën gjithçka edhe më të ndërlikuar,” thekson ajo.
Para se të mbeteni “miq”, bëjini vetes këto pyetje:
1. Pse do të doja të isha mik me dikë që më ka tradhtuar ose gënjyer?
2. Pse do të doja të mbaja pranë dikë që nuk më ka respektuar?
3. Pse do të doja të isha mik me dikë me të cilin nuk arrija të komunikoja apo të plotësoja nevojat reciproke?
Sipas ekspertes, ajo që ndan një marrëdhënie të shëndetshme nga një e pashëndetshme janë qëllimet dhe motivimet e secilës palë.
“Një marrëdhënie e ndërtuar mbi frikën nuk mund të jetë e shëndetshme,” shprehet ajo.
Çfarë forme merr frika në këto raste?
1. Frika se mos e humb përgjithmonë tjetrin nga jeta.
2. Frika nga braktisja.
3. Mendimi se do të mbetesh vetëm.
4. Shpresa se ish-i do të ndryshojë.
5. Xhelozia nga ideja se ai/ajo mund të gjejë dikë tjetër.
Në shumë raste, një marrëdhënie dashurie toksike thjesht transformohet në një miqësi toksike.
Shenjat që tregojnë se “miqësia” nuk është e shëndetshme:
1. Vazhdoni të bëni seks shpesh.
2. I dërgoni njëri-tjetrit mesazhe si “më mungon”.
3. Ndjeni se është detyra juaj ta mbështesni emocionalisht pas ndarjes.
4. Nuk e përballoni dot kur flet për partnerë të rinj.
5. Kjo e fundit, sipas ekspertes, është vendimtare.
“Si mund të jeni miq nëse nuk duroni dot të flisni për jetën romantike të njëri-tjetrit?”
Kur mund të funksionojë një miqësi me ish-in?
1. Kur të dy e keni mbyllur kapitullin romantik dhe jeta juaj ka marrë një drejtim tjetër.
2. Kur marrëdhënia ka qenë e shëndetshme dhe e respektueshme.
3. Kur ndani të njëjtin rreth shoqëror ose keni fëmijë dhe dëshironi të ruani një raport civil e të qetë.
Test i thjeshtë: A mund të jesh mik me ish-in?
A pajtohen miqtë dhe familja juaj që marrëdhënia ka qenë e shëndetshme?
Pse dëshironi ta mbani këtë person në jetën tuaj?
Ekspertja këshillon të analizoni emocionet që lindin nga përgjigjet tuaja. A ndjeni frikë dhe trishtim? Apo dashuri të qetë, mirënjohje dhe gëzim të sinqertë?
Sepse, fundja, një marrëdhënie dashurie toksike rrallëherë shndërrohet në një miqësi të shëndetshme.
