"Jam 34 vjeç. Jam nënë prej 5 vitesh. Kam dy fëmijë të vegjël dhe jam prej më shumë se një dekade e lidhur me burrin tim. Jemi njohur që në universitet dhe, si çdo çift, kemi pasur periudhat tona, të mira dhe të vështira, përfshirë dhe ato që lidhen me jetën seksuale.
Por ajo që më shqetëson së fundmi nuk është mungesa e seksit, por mënyra si ndihem kur ndodh.
Sapo u bëra nënë për herë të parë, fillova të ndiej një lloj faji, si një zë i brendshëm që më thoshte “Tani je nënë. Nuk është më koha për këto.”
Dhe nuk flas për ndonjë problem konkret me partnerin, se kemi marrëdhënie të mirë, ai më do, më kupton dhe nuk më bën presion. Por unë nuk ndihem rehat. Madje, kur e mendoj, më mbulohet trupi me një ndjesi faji dhe neverie që nuk e kuptoj plotësisht. Dhe pas aktit, ndonjëherë më vjen të qaj. Ndihem sikur po bëj diçka që bie ndesh me rolin tim si nënë.
Më duket gati-gati sikur nuk mund të jem të dyja: edhe grua që ndjen, kërkon dhe përjeton seks, edhe nënë e mirë që rrit fëmijët me dashuri dhe përkushtim. Edhe pse me mendje e di që kjo është një ndarje absurde dhe patriarkale e roleve, zemra nuk më bindet lehtë. Kam një lloj bllokimi emocional, një pengesë që më ndalon të ndiej kënaqësi, sepse më duket sikur po bëj diçka “të pistë”.
Ka pasur kohë kur kemi bërë seks disa herë në javë dhe kam qenë më e lirshme. Po tani? Kanë kaluar dy muaj që kur kemi bërë seks për herë të fundit dhe nuk ishte përvojë që më pëlqeu. U ndjeva sikur thjesht po “bëja detyrën” dhe kur mbaroi, mezi prisja të dilja nga ajo situatë.
Më ndodhi dhe herën tjetër para asaj dhe tani këto periudha po zgjasin gjithmonë e më shumë. Ndonjëherë ndihem si gruaja që vlen thjesht për punët e shtëpisë dhe për të rritur fëmijët. Nuk ndihem më si ajo vajza që dikur kërkonte, eksperimentonte, dëshironte...
Po e ndaj këtë sepse ndoshta nuk jam e vetmja. Ndoshta edhe gra të tjera që janë bërë nëna dhe kanë ndjerë të njëjtën ndjesi faji, pengese, pasigurie. Dhe dua të kuptoj, a është kjo normale? A është kjo thjesht një fazë? Apo është një shenjë që duhet të flas me një profesionist? Nuk dua ta humbas lidhjen me burrin, nuk dua të mësohem me këtë ndjenjë boshllëku në intimitet, por nuk po di nga t’ia nis.
Nëse është dikush që e ka përjetuar këtë, do doja shumë të lexoja mendimin apo përvojën e saj.
Faleminderit," - shkruar nga një grua e sinqertë.
Copyright Anabel.al / Ndalohet ribotimi pa lejen e redaksisë.
-
-
-
Mes nesh: "27 vjeç, ende e virgjër. Ku dreqin qëndron problemi im?"
20 Qershor, 19:29 -
Mes nesh: "U trondita kur kuptova se isha abuzuar në fëmijëri"
13 Qershor, 19:33 -
