Kate Hudson ka folur hapur për mënyrën se si i përjeton ndarjet, duke shpjeguar pse nuk beson në diskutime të stërgjata kur njëri nga partnerët nuk dëshiron më ta vazhdojë lidhjen.
Aktorja, e cila është e fejuar me muzikantin Danny Fujikawa që nga viti 2021 dhe ka me të një vajzë, Rani Rose, dha një intervistë për SiriusXM, ku foli hapur për përvojat e saj personale dhe mënyrën si i përballon ndarjet apo shkëputjet e marrëdhënieve.
“Nëse një burrë më thotë se nuk më do më, se nuk dëshiron të jetë më në një lidhje, unë thjesht largohem,” u shpreh ajo.
“Nuk jam tipi i vajzës që thotë: “Prit ta flasim”. Nuk ka kuptim! Unë them vetëm “ në rregull” dhe vazhdoj përpara.”
Hudson tregoi edhe një përvojë konkrete, kur një ish-partner i komunikoi se donte të ndaheshin dhe më pas kërkoi ta diskutonin më gjatë vendimin.
“Ai më tha: ‘Nuk mendoj se mund ta vazhdoj lidhjen më gjatë.’
Unë iu përgjigja: ‘Në rregull.’ Më pas më pyeti nëse doja të flisnim për t’u sqaruar, por sinqerisht nuk kisha fare dëshirë,” rrëfeu ajo.
Aktorja theksoi se, për të, kur vendimi është marrë, nuk ka kuptim të bëhet një bisedë që nuk ndryshon asgjë.
“Kur dikush përpiqet të rikthehet vetëm sepse nuk është më në një lidhje tjetër, përgjigjja ime është “jo”. Gjërat kanë përfunduar dhe nuk ka arsye të lidhemi sërish,” tha ajo.
Komentet e saj u bënë në kuadër të një bisede më të gjerë për karrierën dhe rrugëtimin në kinematografi. Gjatë intervistës, ajo kujtoi edhe posterin ikonik të filmit Almost Famous, i cili i solli nominimin e parë për çmimin Oscar. Aktorja rrëfeu se, kur e pa për herë të parë posterin, mendoi:
“Shpresoj që të gjithë ish-të dashurit e mi ta shohin. Shpresoj që të gjithë ata që më refuzuan të kalojnë nëpër Times Square dhe ta shohin.”
Hudson është nënë e tre fëmijëve: Ryder, nga martesa me Chris Robinson, Bingham, nga lidhja me Matt Bellamy, dhe Rani Rose, nga marrëdhënia me Danny Fujikawa. Aktualisht, ajo vazhdon të jetë aktive në projekte të reja dhe mbetet një nga figurat më të dashura të kinemasë amerikane.
