Pantone ka bërë publike Ngjyrën e Vitit 2026 dhe përzgjedhja ka shkaktuar një debat të madh online. Më 4 dhjetor, kompania prezantoi nuancën që sipas tyre përfaqëson vitin e ardhshëm: Cloud Dancer (ai/ajo që vallëzon me retë), një nuancë e së bardhës. Sipas Pantone, kompania që krijon dhe standardizon ngjyrat që përdoren globalisht, kjo ngjyrë simbolizon “një ndikim qetësues në një shoqëri që po rizbulon vlerën e reflektimit të qetë.”
Kjo është hera e parë që Pantone zgjedh një nuancë të bardhë si Ngjyra e Vitit.
Ata e përshkruajnë Cloud Dancer si një të bardhë të butë, të mbushur me qetësi, e cila të çon në relaksim dhe përqendrim, duke i dhënë mundësi mendjes të endet lirisht dhe krijimtarisë të marrë frymë.
Në platformën e tyre, Pantone shton se në një botë ku ngjyra është kthyer në një formë të shprehjes personale, kjo nuancë ka aftësinë të përshtatet, të harmonizojë dhe të krijojë kontrast. Ajo jep një ndjenjë lehtësie ajrore në çdo mjedis apo produkt, qoftë si element i vetëm, qoftë i kombinuar me ngjyra të tjera.
Si përzgjidhet Ngjyra e Vitit?
Pantone mbështetet në një ekip global ekspertësh të ngjyrave, të cilët analizojnë ndikime nga filmi, televizioni, arti, moda, trendet e dizajnit, teknologjitë në zhvillim, materialet e reja, rrjetet sociale, por edhe ngjarje të mëdha botërore. Sipas kompanisë, çdo element kulturor i vitit mund të ndikojë në përzgjedhjen e ngjyrës dhe pesha e secilit ndryshon nga viti në vit. Laurie Pressman, zëvendëspresidente e kompanisë, ka thënë më herët se, pavarësisht pikëpamjeve të ndryshme, anëtarët e institututit gjithmonë arrijnë në një konsensus.
Pse ka shpërthyer reagim i fortë?
Reagimet publike kanë qenë të përziera, por shumë kritikë e konsiderojnë zgjedhjen të papërshtatshme në aspektin krijues dhe kulturor. Disa dizajnerë dhe përdorues të rrjeteve sociale janë shprehur se përzgjedhja e një nuance të bardhë “në këtë klimë sociale dhe politike” është e padenjë dhe tregon mungesë ndjeshmërie kulturore. Shumë njerëz e quajtën zgjedhjen “të paditur”, “të shkëputur nga realiteti artistik” dhe “mungesë krijimtarie”.
Të tjerë argumentuan se në një periudhë kur ngjyra përdoret për të shprehur kulturë, diversitet, emocion dhe inovacion, zgjedhja e një të bardhe të pastër është e gabuar në ton dhe në rastin më të keq mban konotacione problematike.
Ka pasur edhe debate më praktike: disa përdorues theksuan se e bardha, sipas perceptimit artistik tradicional, “nuk konsiderohet ngjyrë”, duke e parë këtë si një zgjedhje të varfër krijuese.
A ka reaguar Pantone ndaj kritikave?
Pas shpalljes së ngjyrës, Laurie Pressman tha se aspektet që lidhen me tonet e lëkurës “nuk kanë luajtur asnjë rol” në këtë zgjedhje. Ajo rikujtoi se edhe nuancat e vitit 2024 dhe 2025 u kritikuan për të njëjtën arsye, edhe pse Pantone nuk kishte synuar asnjë referencë të tillë.
Drejtoresha ekzekutive e Institutuit të Ngjyrave të Pantone, Leatrice Eiseman, iu përgjigj kritikave për mungesë krijimtarie duke theksuar se nuk bëhej fjalë për një zgjedhje “nga dembelizmi.” Sipas saj, nuanca është menduar të përfaqësojë një “kanavacë të zbrazët”, një hapësirë të re për ide të reja, mundësi të reja dhe mënyra të reja të të menduarit.
