Katy Perry dhe Orlando Bloom/ FilmMagic

Pas nëntë vitesh dashuri të trazuar dhe një fejesë të gjatë, Orlando Bloom dhe Katy Perry i kanë dhënë fund lidhjes së tyre romantike. Por, sipas aktorit britanik, ndonëse rrugët e tyre si çift ndahen, një gjë mbetet e përbashkët dhe e paprekshme: dashuria për vajzën e tyre, Daisy Dove.

“Daisy është përparësia jonë – gjithmonë ka qenë, gjithmonë do të jetë,” thuhet në deklaratën zyrtare të përbashkët të publikuar nga përfaqësuesit e çiftit.

Deklarata thekson se Orlando dhe Katy “kanë kaluar muaj duke e transformuar marrëdhënien e tyre në një partneritet të shëndetshëm”, dhe se “do të vazhdojnë të shihen së bashku si një familje.”

Fejesa e tyre përfundoi zyrtarisht pak javë më parë, por sinjalet e ftohjes ishin ndjerë prej kohësh. Burime pranë çiftit zbuluan se “problemet kanë qenë të pranishme prej vitesh”, dhe se ngarkesa e tepërt në jetët e tyre profesionale e bënte gjithnjë e më të vështirë të komunikonin dhe të gjenin kohë për njëri-tjetrin.

Orlando, i njohur për natyrën reflektuese, ka ndarë në rrjetet sociale citate të Jung-ut për vetminë dhe fillimet e reja, duke i dhënë ndarjes një nuancë të thellë emocionale. Ndërkohë, Katy Perry u kthye në skenë në Australi, mes duartrokitjesh dhe emocioneve të papërmbajtura, duke falënderuar publikun:

“Faleminderit që jeni gjithmonë aty për mua. Do të thotë shumë.”

Çifti u takua në një after-party të Golden Globes në vitin 2016. U ndanë në 2017, por dashuria i ribashkoi një vit më vonë, dhe në 2019 erdhi propozimi romantik. Vajza e tyre Daisy lindi në vitin 2020, duke sjellë një dimension të ri në jetën e tyre, atë të prindërimit.

Sot, ata e ruajnë të dy atë rol me përkushtim të plotë, edhe pse jo më si partnerë në dashuri.

“Ndonjëherë dashuria nuk mjafton për t’i mbajtur bashkë dy njerëz. Por ajo është e mjaftueshme për të rritur një fëmijë me dinjitet, respekt dhe dashuri,” tha një burim pranë çiftit.

_{Burimi: People}